කොලොම්පුරෙන් තල් අරඹට - පළවෙනි වෙළුම

කාලෙකින් මගේ බ්ලොග් අඩවියට මමවත් ආවේ නැහැ. මගේ ආදරණීය මිතුරෙක් මේ අඩවියට ගොඩවැදිලා, ලස්සන අදහස් කීපයක් සලකුණු කරල ගිහින්..හරිම සුන්දරයි.ඒ වගේම ස්තුතියි. කාලෙකින් අකුරු නොකර හිටියට දෙයියන්ගේ පිහිටෙන් අපේ ගමන්බිමන් වලින් අඩුවක්නම් උනේ නැහැ. ඉතින් මතකයේ රැඳුන තවත් සුන්දර චාරිකා වල විස්තර, මේ විදියට දිගහරින්නයි හදන්නේ.

කොලොම්පුරෙන් තල් අරඹට
මගේ ඊළඟ වික්‍රමය

දිනය       : 18 මැයි 2013
කැමරාව  : Sony HX 100V

මෙච්චර දවසක් කොළඹට ආසන්න සොඳුරු දසුන් බලන්න බයිසිකල් වලින් එහෙ මෙහෙ ගියපු අපි ඊට වඩා ලොකු ගමනක් යන්න ඕන කියල කතා බහ කළේ ටික කලක ඉඳලා. කොහොම හරි කොළඹ ඉඳලා යාපනයට බයිසිකලෙන් යමු කියල මගේ සුපුරුදු මිත්‍රයා කසුන් යෝජනා කළේ, ලක් දසුන් වෙබ් අඩවියේ තිබුණ එක වාර්තාවක් නිසා.
කොළඹ ඉඳල කෑගල්ල සහ කුරුණෑගල හරහා අපහු කොළඹට බයිසිකලයකින් තනියම ගිය ගමනක් ගැන අපුරු වාර්තාව ගැන අපේ හිත් ඇදිලා ගියා. මේ වාර්තාව ලියල තිබුණේ ශෂික කියන සහෝදරයා. ශශිකට මේ අපූරු ගමන යන්න දවස තුනක් ගත වෙලා තිබුනා. තනියම යන ගමනේ සැලකිය යුතු අවධානමක් නොතිබුනා නෙමෙයි කියල ශෂික කියන්නේ කවුරුවත් නොහිතන විදියේ අකරතැබ්බ වෙන්න පුළුවන් නිසා වෙන්නත් ඇති. බයිසිකලෙන් දුර ගමනක් යනවනම් ගෙනියන්න ඕන මොනවද කියල බොහොම පැහැදිලිව ශෂික එයාගේ වාර්තාව ඇතුලේ විස්තර කරලා තිබුනා.
වාර්තාව අග ශශිකගේ දුරකථන අංකය තිබුන නිසා අපි වැඩි විස්තර දැනගන්න කතා කළා. ඒ වෙනකොටත් ශෂික අපිව අඳුනන්නේ නැහැ. කොහොම වුනත් අපිට ඕන විස්තර කිසිම අඩුවක් නැතුව ලබාදුන්නේ ගුරුවරයෙක් පාඩමක් උගන්වනවා වගේ.  අපේ ගමනේ අරමුණ මොකද්ද කියල කිව්වට පස්සේ ශශිකත් ගමනට එක පයින්ම කැමති උනා. ඒ කතාබහට පස්සේ අපි තුන් දෙනා එකතුවෙලා ගමනට ඕන සේරම අඩුමකුඩුම එකක් වත් අඩු නැතිවෙන්න ලැයිස්තු ගත කළා. අපි යන ගමන්මග පුරාවටම මනුෂ්‍ය ජනාවාස හමු වෙන්නේ නැති නිසා පුංචි දෙයක් වත් අමතක නොවෙන්න අපි වග බලාගත්තා. මොකද අමතක උනා කියල ආපහු හැරිලා එන්න බැහැනේ.

ගොරක ඇල්ල

දිනය      : 13 නොවැම්බර් 2012
කැමරාව : Sony NEX 7

වර්ග කිලෝ මීටර 65,500 විතර වුණත් මේ පුංචි රටේ අපි නොදන්න ලස්සන තැන් කොච්චරනම් තියෙනවද? මිනිසුන්ගේ ඇස් වලට වහන්වෙලා, සොබා දහම තුල හැංගිලා තියෙන ලස්සන හොයාගෙන යාම එක්තරා විදියකට පිස්සුවක්. මේ පිස්සුව දැනෙන්නේ සොබාදමේ අගය දන්නා, සොබාදම් රසය විඳින්න පුළුවන් හිතකට විතරයි කියල මම හිතනවා. පරිසර සුන්දරත්වය අපේ හිත් වලට ගෙන එන්නේ අපූරු සුවයක්. කිරල මැනලා කියන්න බැරි උනත් සොබාදහම තුළ හැංගුනාම දැනෙන සතුට අතිවිශාලයි. මොකද අපි හැමෝම සොබාදහමේ කොටස් කරුවන්. පරිසරය අපේ උරුමයක් නොවුණත් අපි පරිසරයේ උරුමයක්.

කොඩිගහ කන්දේ සයිකල් සවාරියට පස්සේ අපි තවත් රවුමක් ගියා. ඒ ගොරක ඇල්ල සොයාගෙන ගිය ගමන.හැබැයි මේ ගමන් දෙක අතරමැද අපි තවත් ගමනක් ගියා දඹෝර ඇල්ල කියල තව දිය ඇල්ලක් හොයාගෙන. නමුත් ඡායාරූප නැති නිසා මම ඒ ගමන ගැන විස්තරයක් දැම්මේ නැහැ. ලක්දසුන් වෙබ් අඩවිය ඇතුළේ සැඟවිලා තිබුණ මේ අපුරු දිය ඇල්ලේ විස්තර හොයාගත්තේ මගේ ගමන් සගයා වන කසුන්. දිය ඇල්ල බලන්න යන ගමන ආරම්භ කලේ කොස්වත්තෙන්. උදේ 6.20 ට විතර කොස්වත්තෙන් පිටත් උනේ උදේට ඕන කරන ආහාරත් ගමන් මලු වලට දාගෙනමයි. මීට අමතරව ගමනට අනිවාර්යයෙන්ම ගෙනියන්න ඕන අඩුම කුඩුම ටික,ඒ කියන්නේ බයිසිකල් පොම්පය, ටූල් කිට් එක සහ පැච් කිට් එක කියන මෙන්න මේ ටිකත් අපේ මළු වලටම දාගත්තා.

සිරිපාදේ සමනොළ කන්ද පෙනේ

දිනය      : 07 අප්‍රේල් 2012
කැමරාව : Sony HX 100V

බොහොම අඩු කාල සීමාවක් තුළ සංවිධානය කළත් ලබපු රසයේ කිසිම අඩුවක් නොවුණ  තවත් එක ලස්සන ගමනක් තමයි අපේ සිරිපා කරුණාව. දෙසැම්බර් මාසයේ උඳුවප් පුන් පෝයදාට පසුව ඇරඹෙන සිරිපා සමය ආයෙත් අවසන් වන්නේ එළඹෙන වෙසක් පෝයත් සමගයි. මේ අතරතුර ලැබෙන මාස පහක කාලසීමාව තුළ මේ පුංචි රටේ නන් දෙසින් පැමිණෙන බැතිමතුන්ගෙන් සිරිපා හිමය පිරිලා ඉතිරිලා යනවා. බෞද්ධ, ක්‍රිස්තියානි, හින්දු සහ මුස්ලිම් ආදී සියලුම බැතිමතුන් සිරිපාදය වන්දනා කරන්නේ අපමණ භක්තියකින්. අප මහා තිලෝගුරු බුදු රජාණන් වහන්සේ ලක්දිව වැඩම කළ සමයක, සමන් දෙවිඳුන්ගේ ආරාධනාව පරිදි බුදු සිරි පතුල සිරිපා මස්තකයේ පිහිටවූ බව බෞද්ධ සාහිත්‍යයේ සඳහන් වෙනවා. සිරිපාදය සමග බැඳුණු පුරාවෘතයන් නිසා දෙස් විදෙස් සෑම හදකම සිරිපාදය ගැන තියෙන්නේ හද පතුලෙන්ම එන ගෞරවයක්. සිරිපා කඳු මුදුන දකින සැමවිටම සිතේ ඇතිවන පහන් සිතුවිලි, සිතෙන් පමණක් නොව ගතින්ද දකින්න පුළුවන්. බොහොම ශාන්තිමත් විලාසයකින් සිරිපා කරුණාවේ යෙදෙන ආච්චිලා, සීයලා පමණක් නොව තරුණ තරුණියන්ද සිරිපා සමයේ සුලබ දසුනක්. කිලෝ මීටර දෙකකටත් වඩා උස සිරිපාදය කිසිදු අතුරු ආන්තරාවක් නැතුව වන්දනා කරලා එන්න හැකිව තියෙන්නේ මෙම ප්‍රදේශයට අධිගෘහිත සමන් දෙවියන්ගේ දේවාශිර්වාදය සෑම වන්දනා කරුවෙකුටම ලැබෙන නිසා බව බැතිමත් විශ්වාසයයි.

අප්‍රේල් පස්වෙනි බ්‍රහස්පතින්දා ගත්තු තීරණයක්‌ අනුව ගමනට ලෑස්ති උණේ අපි හතර දෙනයි. මමත් එක්ක බැංකුවේ එකට වැඩ කරන වරුණ, කුෂාන්, කසුන් සහ මම තමයි නඩය. බාලාංශ පන්ති වල ඉඳලා උසස් පෙළ දක්වාම මම හිටියේ රත්නපුරේ වුණත්, මම මෙච්චර කාලෙකට සිරිපා වන්දනාවේ ගිහින් නැහැ. ඉතින් මම කෝඩු කාරයෙක්. නඩේ ගුරෙක් හිටියේ නැහැ. මොකද නඩේ ගුරා විදියට එන්න හිටපු අපේ හිත මිතුරු සුරංගට වෙනත් වැඩක් යෙදිලා තිබුනා.

මීමුරේ ගිය හැටි

දිනය      : 14 මාර්තු 2010
කැමරාව : Sony Ericsson K800i Mobile Phone

මගේ බ්ලොග් එකේ නම අනුව ගැලපෙන්නේ නැති උනත්, ගියපු අනිත් සංචාරයන් වල මතකයන් එකතු කළොත් හොඳයි කියල හිතුන නිසා, ඔන්න මම තවත් විස්තරයක් දානවා. මේ අපි හදිස්සි තීරණයක්‌ මත මීමුරේ ගියපු හැටි.

මේ දවස් වෙද්දී මම හිටියේ දෙල්කඳ පැත්තේ බෝඩිමක. මට වඩා වැඩිමල් උනත්, මම වගේම ඇවිදින්න උපන් හපන් සාමාජිකයෝ ටිකක් හිටියා මාත් එක්කම. 2010 මාර්තු 13 වෙනිදා රෑ 8.00 ට විතර තමයි අපිට ආරාධනාව ආවේ මීමුරේ යන්න. බෝඩිමේ සාමාජික නිශාන්ත අයියාගේ බාප්පා ඇතුළු පිරිසක් තමයි ගමන ලෑස්ති කරලා තිබුනේ. මාර්තු 13 වෙනිදා රෑ 12.00 නුවර කොළඹ බස් එකට අපි කට්ටිය එකතු උනා කොහොමහරි. රෑ නිදි මරාගෙන නුවරට අපි ළඟා උනේ හරියටම උදේ හතරට. අපි නුවරට යනකොට ගෙනියන්න තියෙන සියලුම දේවල් ලෑස්ති කරලා ඉවරයි. නිශාන්ත අයියගේ බාප්පාගේ වෑන් එකට සේරම අඩුම කුඩුම පටවල තිබුණ.